आज पुसट पुसट ….

आज पुसट पुसट 

भासे जीवनाची वाट 

जणु मृगजळ असे 

मिरवित खोटा थाट !

शब्द नसे ओठांवर 

थरथरती सारे स्वर 

मनी दाटले सागर 

डोळे पाण्याचेच घर !

विचाराया असे सोपे 

असे समजाया जड 

आज संपत का नाही 

हा वेदनांचा गड !

बघ पाऊले चालती 

आज मनाला सोडून 

भोळे मनही थांबते 

सारे बंधन तोडून!

ठेच लागते जीवास 

होई जीव कासावीस 

गूढ रुजती ते घाव 

देई त्रास आत्म्यास !

कर संकटांना ठार 

कर दुःखांवर वार

झेल अलगद सारे 

दे ना स्वतःला आधार !!

- मुग्धा जहागीरदार